Inntökuskilyrði við Hússtjórnarskólann í Reykjavík

Til að öðlast inntöku í Hússtjórnarskólann í Reykjavík þurfa nemendur að hafa náð 18 ára aldri. Yngri umsækjendur ganga fyrir þeim sem eldri eru en það er ekkert aldursþak á nemendum.

Nám við Hússtjórnarskólann í Reykjavík er fjölbreytt og það er að mestu leyti verklegt. Nemendur þurfa að búa yfir ákveðinni grunnhæfni til að geta tekið virkan þátt í daglegu skólastarfi. Æskilegt er að nemendur:

• Búi yfir grunnhæfni í lestri og lesskilningi.
• Geti tekið við leiðbeiningum frá kennurum og unnið eftir þeim.
• Geti tjáð sig á skýran og skilmerkilegan hátt.
• Hafi færni til að vinna bæði sjálfstætt og í samvinnu við aðra.
• Geti tekið þátt í verklegum kennslustundum, svo sem matreiðslu, ræstingum og handavinnu.
• Búi yfir grunnfærni í íslensku.
• Hafi reynslu eða tilfinningu fyrir daglegum heimilisverkum og sýni vilja til að taka virkan þátt í þeim.

Þar sem kennslan byggir að verulegu leyti á verklegum kennslustundum og sjálfstæðum verkefnum eru takmörk fyrir því hversu mikla aðstoð skólinn getur veitt nemendum með verulegar sérþarfir eða fötlun. Ekki er hjólastólaaðgengi í skólanum. Við viljum því benda á að nemendur þurfa að búa yfir þeirri hæfni sem nauðsynleg er til að stunda námið með virkri þátttöku og án verulegrar utanaðkomandi aðstoðar. Að því sögðu er komið til móts við hvern og einn nemanda eins vel og kostur er. Nemendahópar eru fámennir og því auðvelt að koma til móts við hvern og einn nemanda eins vel og kostur er.

Umsóknum er svarað jafnóðum og þær berast, eigi síðar en tveimur vikum frá því að sótt er um.

Með greiðslu staðfestingargjalds staðfestir nemandi að hann ætli sér að stunda nám við skólann og um leið að hlíta reglum skólans.

Kennsluvikur

Námið stendur yfir í eina önn og er um það bil 17 kennsluvikur. Sem dæmi hefst haustönnin 21. ágúst 2025 og skólaslit eru 12. desember 2025. Vorönnin hefst 8. janúar 2026 og skólaslit eru 13. maí 2026. Á hvorri önn er vetrarfrí, þrír dagar í kringum helgi. Páskafrí er á vorönninni.

Skóladagatal haustið 2025

Skóladagatal vorið 2026

Kostnaður við skólavist.

Kostnaður við nám/önn við Hússtjórnarskólann í Reykjavík er eftirfarandi:

65.000 kr. innritunar/staðfestingargjald. (Staðfestingargjald er ekki endgreitt, þó nemandi ákveði að hætta við skólavist, hluti staðfestingargjalds fer í nemendaráðssjóð).

580.000 kr. fæðis- efnis og bókakostnaður. (Innritunargjald er ekki innifalið. Skólagjöld fást ekki endurgreidd, þegar nemandi hefur hafið nám við skólann er hann skuldbundinn til að standa skil á skólagjöldum að fullu þótt hann hætti námi).

280.000 kr. fyrir heimavist. Aðgengi að kvöld og helgarmat.

Athugið að hægt er að sækja um ýmsa styrki til að greiða niður náms- og heimavistargjöld, líkt og námsstyrki hjá verkalýðsfélagi sem viðkomandi hefur greitt félagsgjald í.

Allt efni er innifalið í skólagjöldum: Efni í fatasum, útsaum, vefnað, prjón, hekl, ásamt öllum stærðum og lengdum af hringprjónum og fimmprjónum ásamt heklunálum í öllum stærðum, einnig veski undir prjóna og heklunálar. Sníðaskæri, útsaumsskæri, pappírsskæri (til að klippa út snið) málband, títuprjóna og segla. Matreiðsluhefti, prjóna,- vefnaðar- og útsaumshefti ásamt ótal ljósritum og möppum. Nemendur fá einnig töskur merktar skólanum fyrir prjónadót og útsaum. Það sem nemendur kaupa sjálfir er efni í kjól (eina flík) og lopa í lopapeysu. Allt sem upp er talið fá nemendur til eignar. Matur er innifalin ásamt hreinlætisvörum.

Skilgreining skólans vegna réttinda og skyldu nemenda

Reglugerð um ábyrgð og skyldur aðila skólasamfélagsins í framhaldsskólum má meðal annars finna á island.is, https://arc.net/l/quote/ggfuyofd. Slíka reglugerð um lýðskóla er ekki að finna. Nærtækast er að vísa í reglugerðina er varðar framhaldsskólana og er það einlæg yfirlýsing Hússtjórnarskólans í Reykjavík að hlúta að henni. Að sama skapi viljum við impra á nokkrum mikilvægum atriðum hér að neðan.

Hússtjórnarskólinn í Reykjavík væntir heiðarlegra vinnubragða af nemendum, sem byggjast á óskrifuðum, almennum leikreglum og skírskotun til siðferðisvitundar hvers og eins. Að sama skapi mega nemendur vænta heiðarlegra vinnubragða af kennurum og ganga að því gefnu að komið sé fram við nemendur jöfnum höndum, sama af hvaða kynþætti þeir eru, kyni, hvaða trúarbrögðum þeir aðhyllast og sérþarfir sem þeir kunna að hafa, og þar fram eftir götunum. Starfsfólki skólans ber að koma fram við nemendur af virðingu og vinsemd sama hver ástundum og námsárangur sé. Kennarar vinna að því að mennta nemendur og stuðla að alhliða þroska þeirra með fræðslu, uppeldi og þjálfun. Kennurum skólans ber einnig að virða réttindi nemenda og hafa hagsmuni þeirra að leiðarljósi, efla sjálfsmynd þeirra og sýna sérhverjum einstaklingi virðingu, áhuga og umhyggju.

Nemendur skulu forðast að hafast nokkuð það að í námi sínu eða í framkomu sinni innan og utan skólans sem er honum til vanvirðu eða álitshnekkis, eða varpað getur rýrðu ljósi á nám hans eða skóla.

Nemendur skulu upplýsa skólann í umsókn sinni um ofnæmi, sérþarfir og greiningar svo unnt sé að koma til móts við þá eins vel og kostur er.

Nemendum ber að hlíta fyrirmælum kennara og starfsfólks í öllu því er skólann varðar, s.s. fara eftir skólareglum og fylgja almennum umgengnisvenjum í samskiptum við starfsfólk og skólasystkin.

Gerist nemandi sekur um háttsemi samkvæmt gildandi lögum í landinu eða skólareglum mun skólameistari og stjórn skólans taka málið til meðferðar. Að teknu tilliti til alvarleika brots getur skólameistari veitt nemanda áminningu eða vikið honum úr skóla um tiltekinn tíma eða að fullu. Áður en ákvörðun um brottrekstur er tekin skal gefa nemanda kost á að tjá sig um málið og í flestum tilfellum eru þrjár áminningar gefnar áður en til brottrekstrar kemur, með von um bætta hegðun nemanda.

Nemendum er óheimilt að fá aðra til að vinna verkefni fyrir sig í sínu nafni.

Hefji nemandi nám við skólann og greiði innritunargjald því til staðfestingar, skuldbindur hann sig til að greiða skólagjöld að fullu. Kjósi nemandi að hætta á heimavist eftir að skóli hefst er það sjálfsagt mál og þarf nemandi einungis að greiða fyrir þá dvöl sem hann hefur dvalið á henni. Nemandi má koma á heimavist eftir að námið hefst, svo lengi sem það er pláss á henni.

Skólasókn – skólareglur

Mætingarskylda í almennum fögum – 45%
Mætingarskylda í matreiðslu og ræstingu – 75%

Nemendur er sækja skólann þurfa að gæta þess að mæting fari ekki niður fyrir 45% í öllum fögum nema matreiðslu og ræstingu, þá má mætingin ekki fara niður fyrir 75%. Fari mæting niður fyrir þau viðmið er kennurum heimilt að meina nemanda frá því fagi. Ef ástundun fer niður fyrir lágmarkið í meirihluta námsgreina má nemandi ekki lengur dvelja á heimavist skólans og er svo að segja sjálfhættur í náminu. Þrátt fyrir þessar grunnreglur er varðar skólasókn er Hússtjórnarskólinn í Reykjavík mjög sveigjanlegur. Skólinn hjá okkur er einmitt tilvalinn fyrir nemendur sem vilja t.d. fá jákvæða upplifun af skóla aftur eftir t.d. skólaleiða, vilja koma sér í rútínu aftur eins og eftir veikindaleyfi og getum við veitt góðan sveigjanleika í okkar námi. Skólaumhverfið er lítið og náið og getum við haft góða yfirsýn yfir nemendahópinn.

Nemendum á heimavist er frjálst að gista annars staðar og þurfa ekki að tilkynna skólanum  um slíkt.